THE ARTIFACT

مخنۍ خبري

د ستر څښتن (ج) په پېرزوینه موږ په خپلو محدودو امکاناتو سره په دې وتوانیدلو چي د "پښتون" په نامه یوه وېب پاڼه وپرانیزو.

    ظاهراً ددې وېب پاڼي له نامه څخه داسي ښکاري چي ګواکي دا وېب پاڼه د پښتون کام ده او ددې کام په چوپړ کي به وي؛ داسي نه ده. دا وېب پاڼه تردې ستر ملي رسالت لري: دا د یوه کام یا قوم په خدمت کي نه، بلکه د افغانستان د ټولو وروڼو کامونو (قومو) په خدمت کي ده او د یوې پرمختللي نېشنلېسټي مفکورې (اند) پر لاري ځي.

    زموږ دنظره پرمختللی نېشنلیزم یا ناسیونالیزم، قوم پرستي: (پښتون پرستي، تاجک پرستي، هزاره پرستي، ازبېک پرستي...) نه ده؛ بلکه هغه احساس او/ یا سیاسي عقیده یا غورځنګ دئ چي هدف یې په یوه جغرافیایي چاپېریال کي (کله کله د توابعو په ګډون) د یوه ملي دولت تشکیل او د ټولو اتنیکي ګروپو د مادي او معنوي ارزښتو دفاع وي (د ملت جوړوني د پروسې د تطبیق په ګډون.)- البته غریزي قوم پالنه په هیڅ ګون نه ردوو: ددې ترکیب څخه زموږ مراد په یوې کتلې اړوند د یوه فرد اورگانیک، سالم، طبیعي او ټولنیز احساس او رابطه ده ــ د مصنوعي، سیاسي او تجارتي قوم پرستۍ په مقابل کي.

    پردې بنسټ دغه وېب پاڼه د پلرني ــ مورني هیواد ګران افغانستان د هر سالم (د ملي ګټو مدافع) فرد، ټولۍ او ټولني، سوشل ګروپ او قوم د معنوي او مادي شتمنیو ننګه کوي؛ خو دا خبره د پام وړ ده چي که د پردو او د هغو د مزدورانو له خوا داسي خوابدوونکي او سولوونکي خبري او درواغ رامنځ ته کیږي چي د هغو پر بنسټ په ملت کي ځانځاني، د تاریخ او فرهنګ مسخه، بېلتون او دښمنۍ رابرسېره کیږي، نو بیا پښتون وېب پاڼه ځان لومړی ګڼي چي د خپل هیواد د وروڼو کامونو د هستۍ او فرهنګ (کلتور، کلچر) ننګه وکړي.

    دغه زرین اصول چي پورته بیان سوه، نژدې یوه پېړۍ دمخه په کندهار کي د دوو ملي شخصیتو ارواښاد حاجي خدایارخان (د "کوچني شهید" په نامه د پرنګیانو په جوړه سوې دسیسه کي) او بیا د هغه د مبارز زوی ارواښاد محمدرسول خان پښتون د "ویښ زلمیانو" د نهضت اصلي مؤسس په ژوندانه کي عملاً تطبیق سول.

    ارواښاد پښتون به ویل: "زه په پښتنو کي دومره ملګري نه لرم لکه په ازبکانو، هزاره ګانو، تاجکو، هندوانو... کي". (ښایي ددې یو علت به دا و چي ارواښاد پښتون یوولس کاله و نهه میاشتي په شمال کي د بغلان په ولایت کي ددغو خلګو سره سیاسي بندي او دمخه تردې لا د هغو سره استېدلئ و.)

    په دې اساس دا وېب پاڼه د هیواد د ستر ملي مبارز ارواښاد محمدرسول خان پښتون او د "ویښو زلمو" د ملي او پرمختګ خوښوونکي ګوند د اصلي بنسټ ایښوونکي (د ارواښاد خان عبدالغفارخان په خبره: "فخر بارک") په ویاړ نومول سوې او داده خپرېدو ته چمتو کیږي.

    په دې وېب پاڼه کي به د پلرني ــ مورني هیواد او نړۍ په اړوند مهم، بې پلوه او رښتیني خبرونه او انکشافات او همدارنګه به د وروڼو قومونو د تاریخ، کلتور، عقایدو او اقتصادي جوړښت په اړوند د هیواد د لیکوالو لیکني وړاندي سي. همدارنګه به د "ویښ زلمیانو" یا د دریمي دورې د مشروطه خواهانو د نهضت او مشرتابه په هکله هغه رښتیني معلومات وړاندي سي چي زموږ بعضو تاریخ لیکونکو سهواً او/ یا هم په قصدي توګه د تاریخ و پاڼو ته نه دي سپارلي او/ یا یې هم  په ډېري بې انصافۍ سره ددې ملي نهضت او اصلی بنسټ ایښوونکي په اړوند تاریخ ته درواغ ویلي او ظالمانه قضاوت یې کړئ دئ.

    که چیري په دغو لیکنو کي د یوه قوم په ګټه د لیکنو موازنه ډېرېږي او یا لږیږي ددې معنی دا نه ده چي د وېب پاڼي لیکوال داسي غواړي؛ بلکه معنی یې داده چي موږ کافي مواد په اختیار کي نه لرو او یا یې ترحد ډېر لرو.

    موږ د ټولو افغان لیکوالو ــ په هره ژبه چي خبري کوي؛ په هر دین او مذهب چي دي؛ هره عقیده چي لري، هیله کوو چي زموږ سره دا د ملي مسؤولیت د انډي په پورته کولو کي لازمه مرسته وکي او د خدای (ج)، وطن او ملت په وړاندي خپل پور ادا کړي.

    ـــ لیکوال حق لري چي ددې وېب پاڼي محتوا د مأخذ (رفرنس) په یادولو سره اقتباس کړي.

په افغاني مینه

زرغونه دي وي د افغاني ورورګلوۍ زرغونه پاڼه !

تل تر تله دي وي افغان ټاټوبی لرغونې آریانا افغانستان !

برقراره دي وي خپلواکي او افغان ولسواکي !

خوځنده دي وي انساني احساس او انسانیت !